طوش ولبن للمبدع توفيق صكبان

طوش ولبن

*****
حليب ام اوي خوتي الطبع للدوم

ابد ميروب لو كلهم يروبون

انومهم رغد لو چلچل الليل

احط ناطور عمري عله اليحوفون

چنت ازرع شلب مابين الجفون

بس هودر جدرهم عني يحچون

اعسهم بالوفه وحنيتي ماعون

شلت شاهول بيدي شما يعوجون

يوم الطاح حملي ومالت النوگ

ولا چلمة عفه ابين اليشيلون

دفعوني ابأديهم بأول زماط

چفي انطيته من رادوا يزعلون

من عطشوا وحگك عطشة الروح

صرت ناگوط والهم انه ممنون

بس حطيت ايدي عله الجرح يوم

شفت الگصه صارت تحت العيون

شلي بشيلة التابوت بعدين

اذا ماشوف ياهو اللي يشيعون

ردتهم وانه صاحي وظهري مكسور

يجون عله الچذب ويه اليواسون

بعد شتفيد زفراتي عله بلواي

اذا هذا الوكت صاير لليخونون

وبعد ما احسن بدفراتچ يدنياي

لان شفت الاحبهم هم يدفرون

يظل حامض لبنهم كسرته الطوش

واظل زبده وعزيزه شما يخظون

توفيق الصكبان..31-8-2011..روماني