صافرة انذار للشاعر محمد الحسيني

صافرة أنذار ... بطفوف أشصار
تدخلت أنذار المله
من برز عباس ... من برز عباس
*****
صافرة أنذار تسمع بالطفوف
و الخبر عاجل نزل بين الصفوف
هذا أخي زينب برز ولكل تشوف
و الجماجم صفكت ويه الجفوف
من علي الكرار ... ماخذ الأيثار
اليوم تشهد كربله
من برز عباس ... من برز عباس
*****
الكل مقاتل بصمة ظلت واقعه
و بصمة العباس يم المشرعه
يتم الاجساد يوم الفاجعه
بالطفوف الروس تلكه أموزعه
أبظربت البتار ... أصبحوا طشار
كلوب نادت يا هله
من برز عباس ... من برز عباس
*****
من برز عباس عنوانه الأباء
جان همه الماي يوصل بالوفاء
أغتاض أبو الغيره و رعد هز كربلاء
سوه تربة كربله موجة دماء
ما تهمه أخطار ... جنه حامي الجار
الجيش وحده أيقاتله
من برز عباس ... من برز عباس
*****

قائد العباس تم تنصيبه
و كل مقاتل يعتنيله يصيبه
الماي يسأل منه شنهي الغيبه
و النهر لو راده كله أيجيبه
يروي بيه أصغار ... ساقي بالطف صار
و لجروف أتناغي أله
من برز عباس ... من برز عباس
*****
يا منازل يكدر أينازل خطر
هذا ابو فاضل كصد يم النهر
و اليطبره أيخلي بالطبره أثر
بالجماجم يرسم أنواع الصور
عقلي منك طار ... بي صرت محتار
كلت حل المسأله
من برز عباس ... من برز عباس
*****
يا شبل حيدر يل محير العقول
أني شاعر من أوصفك شرد أكول
وانه منك يا كمر هاشم خجول
أعتذر مولاي ما ألكه الحلول
شما كتبت أشعار ... تبقه الك تذكار
عندي صارت معضلة
من برز عباس ... من برز عباس